Ralhrang He Ai Pehtlai Mi Hriamnam Puaisa (Agent) Pawl ” Justice For Myanmar ” Nih A Langhter
Min Aung Hlaing hruai mi ralhrang caah hriamnam le seh thilri pawl Dollars million tamtuk man a cawk piaktu Company le minung pawl cu Justice For Myanmar nih a langhter i an cung ah dantatnak tuah ding in nawlnak zong tuah chih.
Biathli thup a chuak mi catlap pawl le thimri kuatnak record ca ning ah Myanmar ralhrang caah USD million tampi man simi hriamnam le seh thilri cawknak pawl ah ” International Gateways Group of Companies Limited (UGG), Myanmar Consultancy Company Limited le Myanmar New Era Trading Company hna an i tel tiah Justice for Myanmar nih a thanh.
Ralhrang he ai pehtlai mi Company pawl i an Director hna le an lutlai pawl hna munung 18 an si i an zate in Singapore ram ah Company tthen an dirh cio i Myanmar rakhrang le Ramkip i hriamnam zuartu karlak ah phaisa pekchanhnak a fawinak hnga Singapore hi an hman tiah a langhter.
”A sual tukmi ralhrang dirpi nak caah Singapore ram nih Hriamnam puaisa pawl a ram ah umnak nawl a pek hna, Cu caah Singapore ram nih a rannak in hi thil hi maak a fial awk asi ” tiah Justice For Myanmar in chimohuannak nawl ngeitu Ma- Yatana Maung nih a chim.
Hriamnam puaisa hna lak ah a bik in Dr. Nan Htwit Aung hi a biapi bik minung asi i China ram thilri kuathlai tu le Myanmar Air Force le Navy karlak ah rianttuantu a si pin ah Min Aung Hlaing tel in ralhrang kutlai hna he pumpak in pehtlaihnak tuahtu asi.
January 25 i NUG nih cathanh a chuahmi zong ah Dr. Nan Htwit Aung le IGG Company hna cu ralhrang caah hriamnam damh piaktu an si tiah an rak thanh cang.
Cun IGG i Company cheu simi Gateways Hongkong Company zong nih ralhrang caah 2015-2016 ah Vanlawng seh thilri USD 8 Millions man a kuatnak catlap tlap 12 a um , 2016-2017 zong ah USD 3.7 millions man Vanlawng seh thilri le tinbaw thilril voi 5 a kuat tiah Justice for Myanmar nih a langhter.
Cun, ImportGenius record ning ah ralhrang nih uknak lak hnu ah Myanmar Consultancy company nih ralhrang caah seh thilri a kuat tthan tiah theih asi.
