Chaklei Unau Ttangti phu (3) a simi hna nih operation 1027 thok a si in nisarih a rauh hnu November 2 ah Chin Shwe Haw,PaunSai,Tingni le Kyu Kot khuapi hna cu a zapi tlamtling tein kan laak khawh cang tiah November 2 ah an thanh.
Hi Kong he pehtlai in ralhraang lei chimphuan nak nawl a ngeitu Zaw Min Htun zong nih Tuluk le Myanmar ramri i a ummi Chin Shwe Haw, PaunSai le Kyukot hna cu kan sung cang tiah November 1 ah a chim ve.
Hi kahdoh nak chung ah ralhraang sakhaan 100 leng,raltuk nak Tank 6 le hriamnam dang tampi kan laak tiah an langhter.Kahdoh nak a chuahnak hmun hna ah ralhraang nih hriamngan le vanlei in kahdoh nak a tuah caah tualchung mizapi a thi le aa hliam mi zong an um hna tiah theih a si.
Nizan November 2 ah Kutkai peng Kalaing khuate ralzam camp pawng ah ralhraang nih Jet Fighter in bomb a thlak caah Nu pakhat nunnak a liam i mizapi inn cheukhat zong a rawk.
