Shan ramkulh chaklei Operation 1027 a nilinak tiang ah Hpasai khuapi le SAC ralkap sakhan 78 kan laak khawh cang i SAC ralkap 18 an thi, 37 kan tlaih hna leng ah tank pakhat zong kan hrawh chap, tiah chakei hriamtlai ṭangṭi phu thum nih an thanh.
October 30 zanlei suimilam 6:00 ah Muse peng um Hpasai khuapi cu tlamtling tein kan laak khawh cang, tiah MNDAA, TNLA le AA nih an langhter.
Shan ramkulh, chaklei ah ṭangṭi phu thum nih kan thawk mi operation 1027 ah SAC ralkap sakhan 21 kan laak chap i a dihlak sakhan 78 kan laak cang. SAC ralkap 18 an thi i 37 kan tlaih hna, tiah an langhter.
October 29 zong ah MNDAA, TNLA le AA ṭangṭi phu thum nih, SAC ralkap nih kum 10 chung an rak humhhaak cangmi Kokang hmunram um Shante sakhan le Yakhaukkaing sakhan ngan zong an laak khawh, tiah theih a si.
Cu pinah Monekoe le Theinni lei kap kahdohnak zong ah SAC ralkap le Kokang pyituhsit 37 tlaih an si. Nankyun pyituhsit hna zong MNDAA nih an lem ṭhan hna i pyituhsit 30 leng cu MNDAA sinah an lut, tiah theih a si.
