New Delhi ah Chin mi pakhat chungthlet le luak luak in a nunnak liam
India ram New Delhi ah rian a ttuan cuahmah mi Chin tlangval pakhat cu a riantuannak hmun ah chungthlet in a nunnak liam tiah Tedim Times nih a langhter.
Kum 19 mi Tv. Pau Ngaih Thang hi Delhi khua Noida ah OPPO company inn sak ai hlawh mi a si.
An rianttuannak hi ni a lin tuk i a chung nih a thlet, a luak hna a luak pah. A dam kho ti lo i ahawi le nih Sizung ah an kal pi nain an chanh manh ti lo ruangah nizaan Pur(June) 14 zaanlei sml 5 ah khan a nunnak a liam. Sibawi pa nih nan rat a tlai tuk ee tiah a rak ti hna tiin a langhter.
Noida ahhin Laimi 200 hrawng cu China company OPPO le VIVO inn ngan pi an sa hna.
Tv. Pau Ngaih Thang hi rambuai ruangah ram chung um ngam loin New Delhi ah a kal i hlawh chom te in ai cawm mi a si.
OPPO company an saknak ahhin Rs 15000 hrawng an hlawh hna i mah te in rawl i rin a si. Rian ngeitu nih room cu an kan pek ko nain rawl cu kanmah tein kan i chumh tiah hruaitu pakhat nih a chim.
