Myanmar mizapi nih duh mi SAC ralkap an hram bongh khawh ding le Federal rampi ser khawh nak ding ah Unau phu 3 a si mi MNDAA,TNLA le AA hna he ttangti in SAC kan doh cang lai tiah Pa-O National Liberation Organisation PNLO nih nih phungning tein a hun thanh.
PNLO cu rampumpi kahdaihnak hnatlaknak NCA ah min a thu mi kan si bantuk in kum 8 chung ruahchannak nganpi he NCA zulhphung kan zulh cang nain a tu tiang zumhtlak mi a phi chuak zei hmanh kan hmu kho rih lo tiah an langhter.
January 21 ah Shan ram thlanglei Hupung peng SanPhu khuate ah PNLA motor rual cu SAC kuttang Pyithusit a si mi PNO hna nih an kham caah kaphnihkar kahdohnak aa thok hma sa.cu kahdohnak cu a kauh lo nak ding ah SAC he ceihhmai nak kan ngei ko nain a tlam tlin lo caah January 22 ah SAC nih PNLO head quarter umnak Nawhtaw khuate ah kahdohnak zei hmanh um lo in vanlawng in bomb a rak thlak caah khuami inn le lo a rawh leng ah a thi mi zong an um caah Hsi Hseng khuapi tiang kahdohnak a chuah hi a si tiah an langhter.
A tu a cang lio mi Kawlram buainak cu Miphun buainak a si lo i SAC le a riantuanpiaktu mi cheukhat hna le namneh a tong mi tlangcungmi le mizapi hna karlak ah a chuak mi buaibai nak a si caah mizapi nih duhmi Federal democracy a chuahkhawh tiang ral kan tu lai tiah an langhter.
SAC cu kan doh ko hna lai nain Pa-O miphun mah le mah cu i kah kan duh lo caah SAC lei ttang in a um mi hna nih a rauh hlan ah ruahnak thleng in mizapi lei ttan ding in PNLO nih cun a thanh chih.
