NC Thawng Tha Thang le chungkhar nih Pathian riantuantu mualliam mi hna philhlonak ah tiin MECA Relief ah sing 80 bawmhnak an pek
Rev. NC Thawng Tha Thang le chungkhar nih COVID-19 in mual a liam mi Pathian riantuantu hna philhlonak ah tiin Myanmar Evangelical Christian Alliance (MECA Relief) sin ah tangka sing 80 (Ks.8,000,000) August 19 ah bawmhnak an pek tiah kan theih.
“Ka riantuan hawi hna philhlonak ah a si. Vawlei cung ah hin lung a fak i, philh awk a ṭha lomi pahnih a um. Pakhat cu Vawleipi Ral a si i, a dang pakhat cu Vawleipi Rai a si. Atu bantuk in Vawleipi rai nih a kan den cuahmah lioah ka miphun hawi le ka minung hawi hna nih harsatnak an ton mi ka hmuh tik ah ka lung a ṭha lo tuk. Cucaah kei zong ka nunnak hmanh ruat ta loin, ka si khawh chung ka ngeih mi thazaang dihlak chuah in dohnak rian ka ṭuan hi a si. Kan upatmi Pathian rianṭuantu tampi kan sungh hna ruang ah ka ngaih a chia tuk. Pathian rianṭuantu tampi kan sungh hna nak a ruang bik cu Samaritan’s thinlung ngei in midang he pehtlaihnak tampi an tuah i, an i pumpeknak ruang ah a si. Cucaah, MECA hmang in Pathian rianṭuantu hna caah tiah kei le ka innchungkhar nih ting (80) cu MECA relief rian ah bawmhnak kan pek ve,” tiah a facebook cahmai ah a tial.
A kan liamtak mi Pathian rianṭuantu hna nih an tantak mi chungkhar hna caah thlacampiaknak he, hi raipi hi ka miphun hawi le ka minung hawi hna caah ka si khawh chung in ka doh rih lai. A kan liamtak mi kan hawi tha hna kan phlih kho hna lo, Pathian, kan lei ah ṭang in kan bawm hram ko, ti zong a tial.
Rev. NC Thawng Tha Thang cu General secretary (Believers Church, Myanmar), AGS – II (Myanmar Evangelical Christian Alliance), President (Chinland Football Club), President (Chinland Foundation), President (Chin COVID-19 Rescue Team), President (Lai Chiat-that Bu, Yangon) tiin Pathian rian siseh, ram le miphun rian ah luhlinh in a tuan lio mi mino pakhat a si.
