Kayin ramkulh Myawaddy khua Tinkan Ngyinaung um SAC LIB 355 sin ah a rak tum mi SAC raltuknak helicopter pakhat cu KNLA/PDF Cobra Column nih nihin January 29 zanlei slm 2:30 tluk ah tla lak in an kah i a chung cuang SAC Division 44 uktu Brigadier fak piin hliam a tuar i midang minung 5 nak tlawmlo an thi tiah PDF Southern Military Region in rian ngeitu pakhat nih Myanmar Now ah a chim.
SAC LIB 355 sakhaan ah a rak tum mi helicopter pahnih cu Cobra column nih Missile,Point 5 le Sniper hna hmangin an kah hna i helicopter mawngtu meithal kuan nih a khen caah a tu bantuk in a tlak hi a si tiah a chim.
“SAC bawi pawl cit mi Eurocopter phun a si i SAC division 44 uktu Brigadier Aye Min Naung cu fak piin hliam a tuar,a hliam in a thi theo lai” tiah a chim.
Cu thawng he pehtlai in Kayin dothlennak ralkap KNLA hruaitu lei zong nih an fehter tiah an langhter. SAC division 44 cu Mon ramkulh,Kyaikto khua hram bunh an si i helicopter kahthlak a si nak LIB 355 he meng 100 tluk aa hlat.
Helicopter a tlak nak hmun cu SAC hna an phan i chanhchuahnak hna an tuah cuahmah hna tiah an langhter chih.
