Atulio Myanmar ah SAC ralkap ruang ah siseh, COVID-19 ruang ah siseh, harnak a tong mi hna cu minung hawi zawnruahnak in American nih US dollar nuai 50 ($ 50 million) renglo bawmhnak a pek lai, tiah US Ramdanglei Minister Zung nih an thanh.
Tirawl eidin ding, umthutnak, le dinti tibantuk ngeih lo awk a thalo mi thil bawmhnak pek an si lai pin ah hrem ruang ah siseh, phungning loin dantat ruang ah a zaam mi hna le ngandamnak kong ah volunteers in rian a tuan mi hna zong bawmhnak pek an si lai, tiah Ramdanglei Minister Zung nih an cathanh ah an tialchih.
Myanmar ram lawng si loin Thailand ram zong US dollar nuai 5 bawmhnak pek an si ve lai, tiah US Ramdanglei Minister Zung in Chimphuannak Nawlngeitu nih a chim.
Hi bawmhnak hi minung hawi zawnruahnak in bawmh mi a si lai i Thailand le Myanmar ram nih an tuar mi harnak le COVID-19 ruang an lungretheihnak hi a zaanter deuh lai, tiah a cunglei tuanvo ngeitu nih a chim fawn, tiah British Broadcasting Corporation nih a langhter.
