Myanmar ram ramkhel buaibai nak ruang ah Mizoram a rak phan mi Myanmar ralzam hna caah a si khawh chung tuan piak ding in India central cozah he a rauh hlan i ton nak ngeih ding mi ah chim phuan nak ka ngei lai tiah Mizoram Chief Minister thar a tuan ding mi Pu Lalduhoma nih a chim.
Mizoram legislative Assembly (MLA) thimnak ah tei nak a hmuh hnu ah cozah thar a ser ding mi Zoram People’s Movement hruaitu Pu Lalduhoma nih cozah serding kong he pehtlai in Mizoram governor he ton nak an ngeih hnu ah media sin ah a tu bantuk in a chim hi a si.
India Misnistry of Home Affair le Foreign Minister hna he phone in kan i chawnh zong ah Myanmar ralzam hna kong le India nih Myanmar cung ah zei tin dah a cuanh timi kong ka chim leng ah a ra lai mi New Delhi i mipum in ton tik zong ah Myanmar ralzam hna caah a si khawh chung in chim phuan nak ka ngei lai tiah a chim.
A voi (9) nak Mizoram MLA thim nak cu November 7 ah khan rak tuah a si hnu ah December 4 ah vote rel a si i Zoram People’s Movement (ZPM) nih thutdan 40 chung ah 27 ah teinak an hmuh caah cozah an ser khawh hi a si.
A ra lai mi December 8 ah khin Mizoram cozah thar siam nak ding caah ZPM party cu phung ning tein baible biakam nak tuah an sit e lai tiah theih asi.Mizoram chung ah hin Myanmar ram in Chin mi minung 30000 tluk ralzam dirhmun in an idor cuahmah lio a si.
