Monywa Khuapi Chungum SAC Ralhrang Riahbuk Pakhat Cu Democratic Guerrilla Force Phu Nih An Kah, Ralhrang 3 An Thi
Democratic Guerrilla Force (Lower Chindwin) nih Monywa khuapi in thlenglei sang i khuapi luhnak zawnah a ummi SAC ralhrang riahbuk cu kahdohnak tuah dingin an i hmuitimhmi asi caah December 8 zinglei sang suimilam 4:55am timhcia tein an tuahmi bomb in an puahhnawh hna pinah ruahlo piin luhhnawh in an rak kahdoh hna caah SAC ralhrang leikap 3 an thi colh tiah thawngtheih asi.
DGF (L.C) nih nihin kahdohnak an tuahmi kong he pehtlai in SAC ralhrang nih a liamcia December 5 ah Yangon khuapi chung, Gyih Myin Taing (ကြည့်မင်တိုင်) sang, Panpyingyi (ပန်းပင်ကြီး) lam ah hriamnam ngei lomi, dai tein lamzawhnak a tuahtu mizapi hna cu zaangfah zawnruahnak ngei loin motor in an rak pahchih.
Cupinah kum 2021 December 7 zongah Salinggyi (ဆားလင်းကြီး) peng Dungdaw khuachung i mizapi, hriamnam zong a ngei lomi minung 11 hna cu meikhangh in an thah hna caah tiin atu bantukin kahdohnak le lehrulhnak chamnak kan tuahnak asi tiah Democratic Guerrilla Force-Lower Chindwin (DGF LC) nih cathanh an chuah.
