Mizoram Le Assam Cozah Palai Hna Ramri Kong Ah An I Chawn Nihin August 5 ah Mizoram le Assam ramri buainak kongah remdaihnak kawl dingin a rak ra mi Assam cozah palai cabinet minister pahnih le Mizoram cozah aiawh hna cu Aijal Club ah an i chawn. Assam cozah aiawh in a rak ra mi hna hi Border Pretection & development minister Pu Atul Bora, urban development, irrigation minister Ashok Singhal le Border Pretection & development secretary Pu GD Tripathi hna an si. Cozah pahnih hna i chawnhnak nih state 2 kar remnak a um khawhnak dingah palek le forest hna cu ramri ah petrolling tuah lo ding le palek zong chap lo dingin an lung a tling i,Central cozah nih ramvengtu ralkap an rak chiah ding cu an lung a tling. Ramri ah remnak le himnak a um khawhnak caah ramri kong cu cabuai cungah i chawnh ding le state pahnih ramri ah remnak le himnak a um khawhnak dingah a si khawh chungin hmalak dingin hnatlaknak an ngei. Mah hnatlaknak hi Mizoram le Assam nih ramri an i hrawmnak Karimganj district, Hailakandi district, Cachar district, Mamit district le Kolasib district chung ramri thluan ah a um vialte a huap lai. Assam palai Atul Bora nih Assam nih Mizoram luhnak lam an kham mi cu Mizoram home minister he kan i ceih lio a si i, a rauh hlan ah kan tawlrel zau lai. Assam cozah nih Assam mipi hna Mizoram ah lut rih lo dingin a ti mi zong zuh than a si cang lai. Ramri ah mi nih thinphannak an ngeih ruangah a si a ti. Assam nih ritkhawh mi sii le caw kong media pawl biahalnak he pehtlaih in buainak tuah ding si loin, remnak kawl dingin a rak ra mi kan si. A rauh hlan ah zeipoh a tha than te ko lai tiah a chim. I chawnhnak ah Mizoram aiawh palai hna nih July 26 ah ramri buainak ruangah Assam lei nunnak a liam mi an um mi cungah poi an ti ningle,hliam a tuarmi hna zong an dam zau nak lai Mizoram cozah nih kan duhpi hna tiah an chim. Mizoram cozah aiawh tu palai hna hi home minister Pu Lalchamliana, revenue minister Lalruatkima, Home secretary Pu Vanlalngaihsaka le home department hruaitu hna an si i, State pahnih palai hna nih i hrawm in cathanh an chuah. # DIPR
