Chin ramkulh Paletwa peng chung ah Mizoram in a lut mi eidin hna cu AA sin ah Tax pek a si kong tualchung mi sin in theih a si.
Paletwa peng chung kahdohnak ruang ah Rakhine le hmun dang dang pehtlaihnak lampi a pih caah tualchungmi hna nih Facang,Chiti,Cite hna cu Mizoram ah laak a si.cu tin an kalpinak lam pi ah AA nih gate siam in Tax an hal hna hi a si.Tax an hal mi hna cu an thilri man i 3% an hal hna tiah theih a si.
“A Hlan ah cun Paletwa i eidin hna hi Rakhine in a lut mi asi,kahdohnak a chuak i lam vialte phih a si tikah Mizoram lei ah cawk a hau,cu tin kan cawk tik ah AA nih kan thilri zohchih in Tax a kan hal.kahdohnak chung ah mizapi hna harnak kan ton cuahmah lio ah a tu bantuk in tax hal kan tong” tiah khuami pakhat nih Zalen ah a chim.
Kahdohnak ruang ah Paletwa peng chung mizapi hna caah rian a har i phaisa luhnak a um lo i eiawk kong ah lungrethei in um caan ah AA nih tax an hal mi hna kong ah tualchungmi lungre a thei. Kahdohnak ruangah tualchungmi hna cu ral an zam hna i a tu tiang mah le umnak hmun ah an kir kho rih hna lo.
