Rakhine ramhkulh,Minpyia khua ralram ah kuat a si mi Hpa-An hrambun SAC LIB 205 battalion in Major Yan Lin Aung telhin ralkap 28 an thi i ralkap 18 an tlau tiah SAC ralkap chung thawng hram sin in theih a si kong Ayeyarwwady Times nih an langhter.
SAC LIB 205 battalion cu aluancia thla hnih ah khan Rakhine ram Minpyia peng SAC division 22 kuttang ralram ah kuat an si cang i an battalion ihruai dan a rawh caah a tu bantuk in a thi mi an tam hi a si tiah theih a si.
“Ralram an kalnak thla hnih lawng a rau rih,Major Yan Lin Aung telh in 28 an thi,a tlau mi zong minung 18 an um,a tu tiang zong an battalion thazaang an chap kho rih lo,cunglei nih ralram ah kuat thlorh in an kuat hna caah an ihruai dan a rawk,cucu SAC chungkhar hna nih an theih lai an phan caah thawng an len ter lo” tiah SAC chung thawnghram nih a chim hi a si.
SAC LIB – 205 battalion hna cu Hpa-An hrambunh battalion an si hna I SAC division 22 kuttang ah operation tuah ding in thlah mi an si caah Kawkareik peng um dothlennak phu hna he a tu le tu kahdohnak a tuah tu an si nain Minpyia lei ah an kuat hna hi a si.
“A Hlan ah hin an battalion chung ah ralkap minung 10 hrawng lawng an um,cu chung ah ralram ah a kal mi hi minung 60 hmanh an tlinglo,an mah lak ah minung 46 an vaivuanh cang caah a taang mi nih zeitindah ral an tuk tilai tihi ruah awk ngai ngai a si” tiah a chim chap.
Minpyia lei a rak kai hna hi AA nih an tuk hna caah a tubantuk in a thi mi an tam hi a si.
