Gangaw peng Minyua palek sakhan laak kahdoh nak ah ralhraang minung 20 nak tlawm lo an thi,anung in 10 an tlaih hna i meithal zun 20 kan laak tiah tualchung hriamtlai nih an chim.
“ nihin November 3 zinglei slm 5:00 tluk ah sakhan laak kahdoh nak thok a si i zinglei slm 7:00 ah sakhan kan lut kho,minung 2 nih an kan kah peng ve caah hriam kan chiah ter hna ” tiah kahdoh nak ah aa tel mi pakhat nih a chim.
Tlaih a tong mi minung 10 hna hi Pyusawhtee le palek pawl an si. A thi mi chung ah Palek bawi changtu Aye Min Soe ai tel i ralhraang minung 7 cu an hriamnam he an zaam caah a tu hi kan kawl cuahmah hna tiah a chim.
Minyua palek sakhan cu zinglei slm 9:00 ah tlamtling in laak khawh a si i 60MM kahnak 1,Jammer 1 le meithal zun 20 laak a si hnu ah sakhan cu mei in an khangh.Gangaw khuachung um ralhraang hna nih hriamngan cu pehtlai in an kah ve i Gangaw peng Taungkhin palek sakhan zong an laak sual lai an phan caah pyusawhtee pawl sentari an cawngh ter hna tiah tualchung mi nih an chim.
Minyua palek sakhan cu NUG runvennak zung kut taang um PDF battalion (1),battalion (7), battalion (11),battalion (12),battalion (14),battalion (19) le ABSDF hna ibawm in an laak mi a si i tuzing ah Kalay-Gangaw lampi cung um ralhraang sakhaan hna cu hmakhat te ah an kah hna cu cheukhat sakhan zong tualchung hriamtlai nih an laak khawh tiah theih a si.
