SAC bawizik Min Aung Hlaing fapa Aung Pyi Sone dirhmi Aung Myint Mu Life Insurance Company nih ralram ah a thi mi SAC ralkap le ralbawi hna caah phaisa liamh an duh hna lo tiah theih a si.
Ralram ah a thi mi SAC ralkap hna chungin a ruak hmuh khawh mi hna lawng phaisa liamh ding a si caah ralkap sii-inn ah a thi ko timi fehternak caa laak hnu lawng ah phaisa liamh a si kong le phaisa zong a zapi in an liamh hna lo kong SAC chungkhar hna nih an chim.
“An thi tak tak ko timi a fiang mi le a ruak hmuh khawh mi lawng phaisa an liamh hna,cu zong cu sii-inn nih theihpi nak caa laak a hau,cu caa laak nak caah phaisa 50,000 kyats liam a hau fawn” tiah Khit Thit Media ah a chim.
SAC ralkap ralram ah a thi ttung i a ruak hmuh khawh lo mi hna cu SAC nih a tlau mi cazin lawng ah an chiah hna i insurance phaisa zei hmanh liamh a um lo tiah theih a si.
“Ruak hmuh khawh lo mi hna cu SAC nih phaisa an liamh duh hna lo leng ah an um nak inn in an thawl hna,Lahkhah (salary) zong an pe duh ti hna lo tikah ei awk zong an ei ti hna lo i mi cheu an fanu le hna cu ai zuar mi zong an um hna, SAC ralkap kan duh ko,kan cohlan ko hna a ti mi zong mithi ruak hmang in an ei hmuar hna” tiah a chim.
Nihin ni tiang SAC ralkap hna le ralbawi hna nih an thlahlhawh chungin thla fatin Life Insurance caah phaisa an khon i ralram ah an thih taktak tik ah cu phaisa cu an pek duh ti hna lo caah ralkap chungkhar hna chung in mawhchiat nak zong a chuak len tiah theih a si.
