Mandalay khuapi in meng 30 tluk lawng aa hlat nak Madaya in nichuah lei ah a um mi SAC ralhraang sakhaan pakhat cu TNLA le MDY-PDF phu fonh hna nih nihin November 27 zinglei sang ah tlamtling tein an laak khawh tiah theih a si.
A tutan SAC sakhaan hi Mandalay in meng 30 tluk lawng aa hlat nak Madaya khua in nichuah lei meng 10 tluk aa hlat nak Kyu-pin khuate le Taphan-kaing khua karlak ah a um mi a si i SAC ralhraang 15 an thi,anung in 4 an thlaih hna leng ah meithal phunphun zun 13 le kuanzen tampi an laak khawh.
SAC sakhaan cu nihin November 27 zinglei slm 8:00 tluk in kah hram an thok i zinglei slm 10:00 tluk ah tlamtling tein an laak khawh hi a si.ttangti phu lei in hliam tuar um lo tein hnu kan kir kho i SAC sakhaan dang zong pehzul in kan doh cuahmah tiah MDY-PDF nih an thanh.
Shan ram chaklei ah kalpi cuahmah mi 1027 operation an rak thok hlan October 26 ah TNLA le MDY PDF ttangti phu nih SAC ralhraang hna sakhaan cu pehzul in kan rak doh cang i cu operation an kal pi cuahmah lio zong ah ngol hlei lo in a tu tiang thlakhat chung ah Madaya,naung-chio, Kyaukme le Moekok peng chung hna ah SAC ralhraang he kahdohnak voi 37 kan tuah tiah an cathanh ah an langhter.
Cu thlakhat chung kahdohnak ah mah mit hmuh ah SAC ralhraang 95 an thi i a nung in minung 11 kan tlaih hna leng ah hliam tuar zong tampi an um tiah an langhter.SAC kan tlaih mi hna kan chiah nak hna ah SAC nih vanlei in bomb a thlak caah minung 4 an thi i cheukhat hliam an tuar.
Thlakhat chung kahdohnak ah MDY-PDF lei in minung 10 nunnak a liam ve i 30 tluk nih hliam an tuar ve tiah theih a si.
