KIA hmunpi umnak Laiza khuapi ral a siam kho tu bik ah ruah mi SAC Kharataung Sakhaan cu nihin March 9 chun ah laak a si cang tiah KIA chimphuannak nawlngeitu Col.Naw Bu nih a chim. Kachin ram ni 3 chung Operations ah SAC sakhaan 20 tluk laak a si cang fawn.
“Nihin zanlei slm 2:00 tluk ah khan KIA hmunpi caah ral lei in a kan tlerhkhawnh kho cem mi SAC kharataung sakhaan cu tlamtling tein kan laak khawh cang” tiah People’s Spring ah a chim.
March 7 in aa thok mi kahdohnak chung ah SAC sakhaan lian le hme tiin 16 laak a si .hmun dang laak mi he 20 tluk a phan cang tiah theih a si.
“SAC sakhaan 16 kan laak cang ka timi cu Laiza pawngkam pawl lawng a si,hmun dang kanmah Brigade 1 hmun ram le Battalion 3 hmun ram hna zong ah sakhaan an laak mi an um hna” tiah Col.Naw Bu nih cun a chim.
Cu leng ah KIA sinah battalion ningin le sakhaan ningin hriam a chia mi zong an um hna.March 8 ah khan Daw-phone-Yan hrambun SAC sakhaan in ralkap 100 tluk le an chung khar 100 tluk an zapi 200 tluk nih hriam an chiah. Cu ni thiam thiam ah hriam a chia mi sakhaan 3 an um tiah theih a si.
KIA nih hin 2023 October 18 thok khan Shan ram chaklei le le Kachin ram hna ah kahdohnak biaktak tein a kalpi i a tu zong biatak tein a kal pi cuahmah lio a si.
