Kareni ah nihin November 11 ah ralhraang hna sakhaan 7 kan laak i ralhraang hna jet fighter 1 zong kan kah thlak khawh tiah KNDF nih phungning tein an thanh.
November 11 ah Demawsoe peng Nan Me Khung khua um ralhraang sakhan hna le Moebe le Loikaw pawngkam ah a um mi ralhraang sakhaan hna cu KA ၊ KNDF ၊ KNPLF ၊ DMO PDF ၊ Loikaw PDF ၊Moebe PDF ၊ Phekhung PDF, Urban Guerrilla force le Shan tlang PDF hna i bawm in an va doh hna caah ralhraang sakhaan 7 cu tlamtling tein an laak khawh tiah theih asi.
Wari Soe Palai,Nant San Khan,Phaya Phyu,Ngaung Wine,Wari Kaw Khu, YiYu le Chi Ke khuate hna ah a ummi ralhraang hna caan saupi hmun an rak khuar cang nak sakhaan hna cu nihin November 11 zinglei slm 5 ah ithok in ralhmun pathum ser in hmakhat te ah an nam hna caah an laak khawh hna.Kahdoh nak chung ah Demosoe,Loikaw le Moebe ah a ummi ralhraang hna nih hriamngan cu tam taktak an kah i raltuk nak vanlawng Jet fighter in voi 20 leng a rak kah bawmh hna leng ah raltuk nak helicopter Mi 35 zong in voi 2 a rak kah bawmh hna tiah theih a si.
Ralhraang hna i a phun min theih rih lo mi raltuknak Jet Fighter pakhat cu KNDF –B01 le KA hna nih (.5) meithal in an kah hna caah vanlawng a khen i a khu chuah buin a kir hnu ah ralram he aa hlat nak hmun pakhat ah a va tla i a khal tu minung 2 hna cu an mah ralhraang lei nih helicopter in an kawl cuahmah hna tiah theih a si.
Tu chun kahdoh nak ah ralhraang hna sakhaan cu tlamtling tein laak an si hna i ralhraang lei a thi mi an tam bantuk in a tlizam mi zong an tam.a nung in tlaih mi zong an tam i meithal zun 100 leng le raltuk nak he aa pehtlai mi thilri tamlak zong an laak .
A tu ah Kareni ram ah kalpi cuahmah mi kahdoh nak cu 11.11 Operation tiah min bunh a si i kareni ram ah lungrual tein ralhraang uknak hloh ding le mah kong mah tein itawlrel nak a chuah khawh tiang lungrual tein kan doh lai tiah an cathanh ah an langhter.
Hi kahdoh nak ah mizapi ralkap lei in nunnak a pe mi an um ve i upat nak sangbik kan pek hna tiah an langhter chih.
