Kanbalu peng,Inngoketo khua le Pintha khua cu SAC ralkap nih hriamhme in an kah hnu ah khua chung ah luh in mei an khangh
Sagaing ramthen,Kanbalu peng chaklei kap um Inngoketo khua cu SAC rallamsiak ralkap nih August 16 ni ah hriamhme kah buin an lut i mei an khangh ruang ah inndong 20 hrawng a kang.August 17 ni zong ah Pintha khua cu hriamngan ,hriamhme kah buin an lut i mei an khangh ruang ah inndong 30 hrawng a kang i caw 3 zong hriamngan nih a tlak hna caah an thi tiah khuami sinin theih a si.
Pintha khua cu SAC ralkap nih a voi hninnak mei an khangh a si.A luan cia 2022 April 29 zong ah SAC ralkap le Pyu Saw Htee phu pawl nih mei an rak khangh ruang ah inn zuat satil pawl an thi i inndong 125 le rawlruk pawl an kang tiah khuami nih an chim.
SAC ralkap an rak luh lio ah khua chung a um mi Inngoketo khuami 2 le Pintha khuami 4 cu an tlaih hna.Pintha khua ah an tlaih mi hna 4 cu August 17 ni ah nikhat chung ni tlang lak ah an thut ter hna i an velh hna.Kum 60 a si mi ဦးပွကြီး cu SAC ralkap nih a ruang um lo in an thah i a dang a tang mi cu an thliah than hna tiah khuami sinin theih a si.
Cu SAC ralkap cu August 18 zinglei ah Pintha-Kyun Hla lam lei um Chaungkyar khua ah um hmun an i thial i Kyun Hla le Pekone khua in Pyu Saw Htee thazaang 50 hrawng nih Chaungkyar khua ah thazaang an va chap than tiah theih a si.(Crd.Khit Thit Media)
