Sagaing ramthen,Kalaymyo khua in Yangon kalnak vanlawng ticket man cu a hlan nakin Kyats 30,000 a kai caah a hlan i Kyats 290,000 arak si tawn mi vanlawng ticket man cu October 16 thokin kyats 320,000 a phan tiah theih a si.
Cu pinah Yangon in Kalaymyo lei kir nak man zong kyats 20,000 leng a kai ve .Ahlan ah kyats 225,000 a si i a tu ah kyats 255,000 tiang a kai ve.Kalaymyo in motor (bus) in khual tlawn ding a tlamtlin lo ngai caah vanlawng deuh in khualtlawn a si i a tu bantuk in vanlawng ticket man a kai cu harnak kan tong ngai ngai tiah khuami pakhat nih a chim.
“kalay-Yangon vanlawng ticket man cu khua dang hna nak in a fak deuh ngai ngai,a hlan ah cun mahtluk a si lo nain,a tu cu cunglei nih an kai ter mi a si caah kanmah tuahkhawh mi zeihmanh a um lo” tiah vanlawng ticket zuartu pakhat nih a chim.
Kalay-Yangon vanlawng ticket cu a ralaimi December thla tiang cawkdih a si cang i Yangon-Kalay ticket zong November thlathok tiang cawk a si ve cang.
Uknak laak a si hlan 2022 tiang ah Kalay-Yangon vanlawng ticket man cu kyats 100,000 fai lawng a rak si nain ram a chiat hnu ah kyats 200,000 ah a kai colh.Uknak laak a si hlan ah cun kalay-Yangon kal duh mi mitamdeuh cu Bus in kal a rak si i kyats 30,000 in nikhat ah phak khawh a rak si. A tu ah cun kahdoh nak tete a um pah lengmang caah thinphang a si i vanlawng deuh in umkal a si.
Atulio Kalay-Mandalay vanlawng ticket man cu kyats185,000 a si i Mandalay-Kalay ticket man cu kyats 175,000 a si.Kalay-Monywa bel a kal he a kir he kyats 131,000 a si tiah theih a si.
