Nihin December 15,lairawn Kalay in laitlang lei ah kai aa tim mi motor hna cu SAC nih kham in a khal tu le pastor pakhat an tuk an velh hna hnu ah an kir ter than hna tiah theih a si.
Laitlang lei kai ding in aa thawh mi motor cheukhat hna cu Kalay Industrial Zone an phak ah SAC ralhraang nih an dir ter hna hi a si i motor mawng tu cheukhat le pastor pakhat hna cu an tuk an velh hna i minute 20 chung tluk an khup an bil ter hna hnu ah Kalay khuachung lei ah an kir ter than hna tiah theih a si.
“Kalay Industrial zonge zawn an phak ah SAC motor pahnih a phan ve i an dir ter hna,zei ah dah laitlang lei kai cu nan duh an ti hna i an thawngh an bengh hna,Pastor pa zong motor chung in an ttum ter ve i an tuk an velh,minute 20 tluk an khup an bil ter hna hnu ah Kalay Khuachung lei ah an khirh than hna” tiah mit hmu tu pakhat nih Zalen ah a chim.
“Laitlang lei ah kai len hlah uh,nan i chawh nan i leh nak ah kan mah he nan iton sual ah cun nawn nan si ko lai,nan hmu maw meithal hi” tiin nihin December 15 thiam thiam ah SAC nih a kan tlerh khawnh ve tiah a dang Kalay khua mi pakhat nih Zalen ah a chim ve.
Kalay PDF hna nih December 15 a hnu bik chia in SAC ralhraang sakhaan,Pyusawhtee Khue le Palek sakhaan pawng a um mi hna i thial ding in thawng thanh nak an tuah hnu ah SAC nih chek hlai nak fak piin an tuah tiah theih a si.
