Pakhat le pakhat kar i Chawnhbiaknak hi I Bochan Tuk Ding A Si Ti Lo KNU Chairman nih Karen Martyr Day cakuat ah a chim.
Kawl ralkap nih rampi uk nak hram hram in an lak hnu ah a Ralkap le tlangcung hriamtlaibu kar ramkhel kong ceihnak le remhdaihnak lam zong hnulei a merh dih caah ramkhel kong ceihnak lam cu bochan awk tlak a si ti lo tiah KNU chairman Gen. Saw Mutu Say Poe nih August ni 12 ah tuah ding mi Martar ni cakuat ah a chim.
Ramkhel buainak kong cu chawnhbiaknak he silhnalh duhnak lungput (Political Will) a um lo ahcun ceihmainak le chawnhbiaknak lam cu bochan le rinh awktlak a si ti lo.
Kawl ralkap Ralhrangbu nih uknak a lak hnuah ralhrang cawlcanghnak, tlaihkhih le sualnak a ngei lo mi hna lainawnnak zong khuate in khuapi tiang an tuah.
KNU nih ramkhel kong cu tonbiaruah le cabuai cungah ceih dingah lam kan on bantukin khattalei ah kan mipi, kan miphun nih ngeih mi le kan ram kan kilven ding a si tiah a ti.
Karen hriamtlaibu dohthlennak lamthluan KNU hruaitu hna kar ah harsatnak, tlamtlinlonak, bu rawh dingin forhnak zong tampi kan ton hlei ah Bu chungah lungrual lo nak le kan thazaang a thawnlo nak dingin timhtuahnak zong a phunphun in kan ton cang.
Harsatnak tampi kar ah Karen mipi, Karen ram dawtu ralkap, hruaitu tampi miphun dohthlennak ah martar in nunnak an pek cang.Zumhnak he nunnak a pe cang mi hna saduhthah a tlin khawhnak dingah ralkap, hruaitu le Karen mipi vialte nih tuanvo kan ngei.
Kan tuanbia, kan phunglam, kan holh le ca a rawk/ a tlau lo nak dingah kilven dingin Karen miphun pakhat cio nih tuanvo kan ngei tiah Gen. Mutu nih kum 71 tlinnak martar ni cakuat ah a chim.
Karen martar ni hi 1950 August 12 ah KNU hruaitu Saw Ba Oo Kyi le hruaitu cheukhat an thih hnuah August 12 cu Karen Martar ni tiin kum fatin hman a si.
Credit.Khit Thit Media
