Karenni Ramkulh Hpasawng khua lei ah ke in a kai mi SAC ralhraang 100 tluk cu lam tantim ah Karenni dothlenak ralkap ttangti phu hna nih an rak kah hna caah an zapi in an thio khawh hna i SAC battalion commander telhin minung 58 cu an tlaih hna.
April 11,zinglei slm 4 tluk ah Bawlakhe khua in Hpasawng lei panh in a kal mi SAC ralhraang hna cu Papu khuate pawng ah Karenni dothlennak ralkap ttangti phu nih an rak doh hna hi a si.
“Chun nitlak kahdohnak a chuak,SAC lei an commander telh in minung 58 kan tlaih hna,hriam kan laak mi le SAC lei a thi mi cazin a fiang rih lo,kan mah lei zong hliam tuar an um le um lo fiang in theih a si rih lo” tiah rian ngeitu pakhat nih a chim.
Cu kahdohnak cu Karenni National People’s Liberation Front – KNPLF, Karenni Ralkap – KA, Kyesin phu-KNSO,Karenni Nation Defense Force – KNDF le PDF ttangti phu hna nih an tuah mi a si.
Hpasawng khua hrambunh SAC ralhraang IB 134 le IB 135 battalion sakhaan hna cu Karenni dothlennak ralkap ttangti phu hna nih phihkhar in an doh cuahmah hna i a thla in an rau cang. SAC lei nih vanlei in kahdohnak an tuah cuahmah ve caah khua i 80 % cu a kaang viar cang tiah theih a si.
