Israel le Hamas kar kahdoh nak cu ni 4 chung ngol ding in nihin November 22 ah kaphnih hnatlaknak an ngei tiah theih a si.Hi kahdohnak ngol chung ah Hamas nih a tlaih mi hna mizapi minung 50 cu a thlah hna lai i Israel nih an tlaih ve mi Palestine minung 150 a thlah ve hna lai.
Kaphnih kar kahdohnak fakpi a chuah zarh 7 a rauh hnu ah a tu bantuk in kaphnih hnatlak nak an tuah khawh a si.hi hnatlak nak cu Qatar ram zuam nak thawng a si tiah an chim cio.Israel lei chimphuannak nawl ngei tu nih cun Hamas nih an tlaih mi hna an pehzul in an thlah hna ah cun hi kahdohnak kan ngol mi zong caan sau deuh a kal kho tiah a chim.
Hamas Phu hna nih hin a luancia October 7 ah Israel cu ruah lo tuk in a doh hnu ah ralphaw minung 240 tluk a rak tlaih hna i cu hna chung in mi 4 lawng a thlah than rih hna.Hamas nih an tlaih mi hna Nu le ngakchia 50 cu nikhat ah minung 10 tluk in ni 4 chung ah thlah ding in timhtuah nak an ngei tiah Israel prime minister zung in chimphuannak nawl ngei tu nih nizan November 21 ah a chim.
Hi hnatlak nak ah Israel lei nih an tlaih mi Palestine minung 150 an thlah hna hnu ah kan tlaih mi hna chung in minung 50 kan thlah ve hna lai tiah an chim.
