Hakhalay ah PDF le SAC Ralhrang an i Kap, Fa 2 Ngei Patung Pakhat a Tlau
Kalaymyo peng le Chin ramkulh ramri ah a ummi Hakhalay khua ah Nizan zaanlei sml. 4:00 in SAC ralhrang le PDF karlak kahdohnak a chuak, tiah thawng kan theih.
August ni 12 ah SAC ralhrang pawl nih Natchaung ah meithal 3 le Panmuanchawng ah meithal pakhat an lakpiak hna hnu ah kahdohnak a chuah hi a si.
Hakhalay khua pawng i Panmuanchawng tiva kiangkap ah zaanlei sml. 4:00 in kahdohnak a chuak i minute 30 hrawng a rau. SAC ralhrang pawl an zaam caah kahdohnak a dai tthan.
Kahdohnak a chuah lio ah Lo in a rak tlungmi fa 2 ngei Pu Sum Lian Thawng hi atu tiang khua a hlam ti lo.
Khuami nih an Leikuang lei zong ah an vung kawl nain an lawng in an rak kir.
Pu Sum Lian Thawng Lothlaam ral ah a ummi hna nih, “A tlun lei kha ralkap an hun lio he bak aa tong. Meithal thawng a thang i kan bok dih hna. Kan zoh tthan tik ah cun kan hmu ti lo. An tlaih caah a si kho men,” tiah an ruahnak an chim.
Hakhalay Believer Khrihfabu biakinn meithal kuan nih a khen pin ah khuahriang inn pakhat pawng zong ah RPG Rocket bomb a tla.
Hakhalay kiangkap ah cun kahdohnak a dai cang i, Natchaung lei tu ah zaan sml. 8:00 tiang an i kap, tiah khuami nih an chim.
Natchaung kiangkap kahdohnak ah SAC ralhrang a tlawm bik 3 an thi i, PDF-Kalay lei in minung pakhat hliam a pu (a fak lo), tiah PDF-Kalay nih thawngpang an chuah. [Updated]
Hakhalay khuami Pu Sum Lian Thawng belte cu atu ca kan ttial tiang (9:30pm) ah an hmu rih lo.
