Chin ramkulh Hakha khuapi ah khuasa mi nu pakhat le pa pahnih an zapi minung pathum cu nunchung thongtlak ding telh in thongtlak ding in biakhiah piak an si kong SAC ttanh Fifty Two News telegram nih January 25 ah a thanh.
Hakha Khuasa Pu Hram Nawl Thang cu dothlennak ralkap hna caah phaisa kawl piak, dothlennak ralkap hna tha pek nak caa social media ah tar le SAC ralkap hna cawlcanghnak cu kherhhlai in CDF sin ah thawng a pek caah tiin kum 7 thong tla ding in biakhiah piak a si tiah an langhter.
Hakha khuasa Pu Ni Bawi Thang cu dothlennak ralkap hna caah eidin pekchanhnak, a puak kho mi thilri bomb i chiah nak le dothlennak ralkap hna caah rawk chumhpiak rian hna a tuan caah tiin nunchung thong thlak ding in biakhiah piak a si tiah an langhter.
Cubantuk thiam thiam in Hakha khuasa Pi Ni Hlawn Sung cu dothlennak ralkap hna caah phaisa kawlpiaktu ah itel ve ruang,Mah hrim hrim nih pekchanh ruang le Messenger hmang in dothlennak ralkap hna caah phaisa kawl piak ruang hna ah nunchung thongthlak din in bia khia piak a si ve kong Fifty Two News nih cun a langhter ve.
Martial law thanhnak Northwestern Military Command hmun ram chung ah phung buar mi minung 354 cu sual phawt in thong thlak an si cang tiah an langhter chih.
