Hakha khuachung biaknak lei hruaitu hna HCMF le Hakha khuachung mipi i bawm in tuah mi Hakha Peng COVID-19 Response Committee nih August 2 thawk in rianttuan hram a thawk cang, tiah thawng kan theih.
Hi an Rianttuannak hmun cu HBA tual ah a ummi Women Development Center ah tuah a si.
“Hi rian ah pumpek in sibawite, sayamate le Khrihfabu kip in mino a bawmtu ca ah HCMF nih ttuanvo a lak lai i herh mi dangdang tampi a um rihmi cu Khrihfa bu, organization le pumpak in ramchung le ramleng nan ti khawh tawk i tel cio ding in kan in sawm hna,” tiah Hakha Peng COVID-19 Response Committee Secretary Rev. Van Tiam nih theihternak le forhfialnak a tuah.
July thla dih lai ah COVID-19 pumpek mino pawl cawnpiak nak an tuah hnu ah tuchun ah hmun an on i, rianttuan hram an thawk hi a si.
Hi COVID-19 raldoh nak ah volunteer ttuan ding in a pum aa pemi hna lak ah sii lei fimthiamnak a cawng liomi siangngakchia 17 zong an i tel i, an zapi ah mino 100 leng an si, tiah Hakha Township Public Healthcare (HTPH) nih thawngpang a rak chuah.
