2023 October 7 zing ah aa thawkmi Hamas phu nih Israel cu Missile a thongthong in a kah hnuah, Israel zong nih vanlei in lehrulhnak a tuah colh ve. Hamas phu nih vulei lei in Israel ramchung ah an luhhnawh hna.
Israel Prime Minister Benjamin Netanyahu nih lakhruak meeting a auh i, ral a tho cang tiah a thanh bantukin, duhtik caan paoh i auh khawhmi ralkap zong pumhkhawmh an si cang. Jew biaknak biami biaknak dinhcaan ah Hamas phu nih an kah hna hi a si i, tutiang ah Israel mi minung 300 leng an nunnak a liam i, a thong leng nih hliam an tuar.
Israel nih vanlei in lehrulhnak an tuah hna ahhin Palestine lei in minung 230 leng an thi i, 1,600 leng hliam an tuar tiah Palestine ngandamnak rianhmun lei nih an chim.
