Austrilia Visa a hmucang mi Chin Refugees 300 leng cu India cozah nih a ram in chuahnak nawl a pek hna lo caah New Delhi caan saupi an taang cang. Cu kong he pehtlai in CHRO le CRC hna nih Austrilia palai Dean Smith cu bawmh an hal.
Austrilia ramin palai Dean Smith ,MP Michael Sukkar, Chin Christian Council in Australia (CCCA), Australia Chinland Club (ACC),Australia Chin Federation (ACF) le Chin Human Rights Organisation (CHRO) hna nih 2023 kum kumkhat chung ah voi 3 tiang India cozah tonnak an ngeih hna hnu ah India cozah nih Chin refugees pawl cu a ram in chuahnak nawl a pek hna tiah theih a si.
“Austrilia palai hna le India cozah kar ah hnatlak nak an ngeih bantuk in Chin refugees 300 leng chung ah minung 40 tluk cu Austrilia ah an lan kho cang i a taang mi 300 ca zong ah a herhmi tawlrel cuahmah a si.Atutan a kal ding mi hna pawl hi a luancia kum 15 hrawng i Austrilia visa a rak ngei cang mi Chin Refugee pawl an si i a tu SAC ralhraang nih uknak an laak hnu ralzaam thar pawl ca a si lo” tiah CHRO in rian ngeitu pakhat nih Zalen ah a chim.
