Dawei-Htee Khee Lampi ah SAC riahcaw phor tu motor rual cu dothlennak ralkap hna nih an kah hna caah an motor 6 aa rawk leng ah ralkap 20 nak tlawmlo an thi tiah theih a si.
“Riahcaw chantu SAC motor ruak kan kah mi hna a si.SAC lei a thi mi an tam ngai nai,an motor hna zong an zam taak hna ERO le PDF hna ibawm in kan kah mi hna a si” tiah thawnghram pakhat nih People Spring ah a chim.
SAC motor hna hi an zapi ah 17 a si mi ralkap thazaang minung 300 tluk an si.Dawei –Htee Khee lampi cung um Wakung khua le Kyaukmee khua karlak an phak nizan February 21 ah khan an kah hna hi a si i kaphnih kar chun nitlak kahdohnak fak pi a chuah hi a si.
Social media ah an tarlangh ning ah a kaang mi SAC motor hna le SAC minung 20 nak tlawmlo ruak cu hmuh khawh an si leng ah hriamnam zun 30 leng zong dothlennak ralkap nih an laak fawn.Kahdohank chung ah SAC nih MI-2 Helicopter hmanh in Wakung khua ah voi 2 bomb a thlak caah tualchungmi hliamtuar an um.
A taang mi SAC motor rual hna cu nihin February 22 zingleisang ah Dawei-Htee Khee lampi cung um Kyaukmee khua palek sakhaan an phan tiah theih a si i kaphnih kar kahdohnak a fak kho mi a si caah mizapi hna i ralrin dingin dothlennak ralkap lei nih an thanh.
