A dik mi democracy ramkomh siamnak ding ah cabuai cung biaruahnak nih zei hmanh a chuah pi khawh ti lo caah SAC ralhraang cu hriam nam in kan doh ve cang lai tiah Shan State Progress Party/Shan State Army (SSPP/SSA) nih nihin ah an thanh.
A dik mi democracy ramkomh siam dingah Panglong Agreement ah min rak thut mi cu SAC ralkap nih zul duh lo in miphun pi ruahnak in ramkomh siam lo in ramkhat phung ser an i timh caah a tu bantuk kahdoh dingin timhlamh nak kan ngei hi a si tiah SSPP/SSA Vice Chairman Swat Khun Saing nih a chim.
“Ram khel kong ah cabuai cung in bia kan rak i ruah nak cu Panglong Agreement thok khan a si i kum 77 a si cang.SAC ralkap a chan chan in tlangcung mi hna zawn ruat loin miphunpi nih dopdawlh viar a kan timh.Panglong Agreement cu an zul duh lo. 2021 uknak an laak hnu in ram khel kong ah bauai cung in i ruah khawh ding zei hmanh a um ti lo i a dang lam a um ti lo caah a tu bantuk hriam in doh kan timh hna hi a si” tiah a chim.
A tu caan cu i laklawh caan a si ti lo,kan duh mi kan hmuh khawh nak ding ah kan tuan a hau, thaizing thadam kan duh cun nihin kan tuan a hau,thaizing ram daih kan duh cun nihin kan doh a hau tiah SSPP/SSA vice Chairman swat Khun Sang nih cun a chim.
SSPP/SSA cu U Theih Sein cozah chan 2012 ah khan kah daihnak min a rak thu mi an si i 2015 le 2017 ah khan SAC nih an hmunpi an nor caah kaphnih kar kahdohnak a rak chuak tiah theih a si.
