Chinland Defense Force-Mara i Chief Strategist (Byuhahmu) le Commander telh in minung 4 hna cu Maraland Defense Force –MDF le Rakhine ralkap AA hna nih a ruang um lo in an tlaih hna i nihin tiang an thlah than rih hna lo tiah CDF-Mara nih nihin January 17 ah cathanh an chuah.
Mizoram lei ah ralkap herhbau zalh ding in a kal mi CDF-Mara ralkap 2 a si mi Hneichua le Bawia hna cu an kir lei Paletwa peng Pathing tlang khua ah hmun a khuar mi MDF ralkap hna nih January 5 ah an rak tlaih hna.cutin tlaih a tong mi hna cu thlah piak than ding in January 7 ah CDF-Mara chief Strategist Pu That Sang le Commander Pu Khuma hna nih an va ton hna i an mah zong cu Shweletwa khua ah MDF le AA nih an rak tlaih chih hna hi a si i nihin tiang an thlah rih hna lo.
“Kan ralkap pahnih a ruang um lo in an tlaih hna caah thlah piak than ding in kan hal mi hna a si.an thlah hlei hna lo caah phone in kan chawnh hna hnu ah Kan Byuhahmu le Commander cu an mah pumpak an va kal i an rak tlaih ve hna caah a tu bantuk in cathanh kan chuah hi a si” tiah CDF-Mara rian ngeitu pakhat nih Zalen ah a chim.
MDF le AA nih an tlaih mi hna minung 4 thawngpang cu nihin tiang zei hmanh kan theih lo caah CDF-Mara le chungkhar hna lungre a thei i Mara le Mara kar ah aherh lo mi buaibai nak a chuak kho mi a si tiah a chim.
MDF le AA nih Paletwa peng Shinletwa SAC sakhaan kan doh lio ah SAC ralkap minung 10 hna cu india lei tlikzam ding in an i timh caah lam vialte kan rak phih viar.cu lio ah CDF-Mara minung 2 hna cu bomb he aa pehtlai mi thilri hna he kan hmuh hna caah kan tlaih hna.Maraland phung phai le Policy kong in caihhmai ding a um rih caah kan thlah rih hna lo tiah MDF lei nih an chim ve.
“CDF-Mara minung 4 kan tlaih mi hna hi a hman ko,a tutiang kan thlah rih hna lomi cu tuah ding thil le Policy kong caihhmai ding tete kan ngei rih.mah dih cun kan thlah ko hna la,an mah he cun chungkhat hawikom kan si,dam tein an um ko hna” tiah MDF in chimphuan nak nawl ngei tu Salai KT nih Zalen ah a chim.
