SAC ralhraang hna nih a hlan tein an zulh phung he aa kalh ruang ah thong an rak thlak mi SAC ralkap hna cu nihin December 7 ah an thlah than hna leng ah a hlan an rak tuan mi rian nak in dot khat an rian an kai ter hna i SAC ralkap chung ah rian an luh than hna tiah theih a si.
Nihin an thlah than mi hna hi SAC ralkap chung rian an tuan chung ah ralkap in zam ruang,zulh phung buar ruang le mithah lainawn ruang hna ah thong rak thlak mi an si hna i ralkap upadi Section 182,Subsection (A) ning in an thlah hna ni thok in an rak in mi sual phawt nak zoh chih in caan rikhiah mi pakhat tiang a si lo ah a mah nih a duh can tiang ralkap rian a tuan lai tiah theih a si. Cu tin ralkap rian a tuan duh lo mi hna cu thong an tlak ding mi a taang rih mi ning tein thong thlak than an si lai tiah theih a si.phun dang chim ah cun ralkap thar an khawm hna ti khawh a si.
A tu tan an thlah than mi ralkap hna cu zei bantuk case hmanh in sual phawt khawh an si ti lo kong an i theih lai i an duh poh in khua an sak cang lai caah mizapi hna umkal iralrin a herh ngai lai tiah ralkap he aa naih niam mi hna nih an chim. Nihin ah an thlah than mi thongtla hna hi an zapi ah minung 1000 leng an si tiah theih a si.
