Rakhine ramkulh,Maungdaw peng i Rakhine ralkap AA le SAC kar kahdohnak ruang ah Bangladesh ram ah a zam mi SAC ralkap le zung riantuan minung 230 len an si cang tiah Bangladesh tualchung thawngzamh hna nih nihin ah an langhter.
Bangladesh ram a phan mi SAC ralkap hna cu an hriamnam an chuh hna i caan karlak dinhnak ah chiah chung hna.nihin zong ah Myanmar lei in a rak zam mi ramri hngak palek minung 7 an um than.a rak lut than mi hna chung ah hliam tuar zong an um caah thlopbul cuahmah an si.
Medecins Sans Frontieries MSF phu hna nih February 4 in 6 tiang ah SAC ralkap hliam tuar minung 25 an thlopbul cang hna i cu hna chung in a dam deuhmi cu an chuah ter hna bantuk in an mah le an hliamhma hoih in sii-inn hna ah an thlopbul hna tiah theih a si.
Ramri kahdohnak ah Myanmar lei in kahmi hriamnam cu Bangladesh ram ah a tlak caah tualchungmi 2 nunnak a liam kong he pehtlai in SAC ambassador Aung Kyaw Moe sinah Bangladesh nawlngeitu hna nih an kawh i hi thil a cang mi an duh lo kong caa an kuat tiah theih a si.
SAC ambassador Aung Kyaw Moe cu nihin zingleisang ah Bangladesh ram a phan i hithil a cang mi an duh lo kong Bangladesh ram foreign minister zung i director general Mia Mohammad Mainul Kabir nih a chim.
