Arakan Army( AA) le Ralhrang An I Kap Tthan
Arakan (Rakhine)ramkulh, Maungdaw peng ah AA le ralhrang pawl tuni,November 11 zing slm 11:00 hrawng ah an i kap tthan tiah khuami hna nih an chim.
Maungdaw kalnak lam mengtung 41le 42 karlak ummi Wala tlangtluan cung ah minute 20 chunghrawng hriamhme in an i kap tiah khuami/ pawngkammi pakhat nih a chim.
”Minute 20 tluk an i kap i hriamngan thawng cu kan thei lo meithal thawnglawng kan theih” tiah Khuahsone khuami pakhat nih a chim. Meithal thawng hi an i kahnak hmun in meng 8 tluk ai hlatnak Khuahsone khua in kan theih khawh tiah a chim chih.
”Tutan kahdohnak a chuah tthanmi kongah kaphnih ceihhmainak a tlamtlin lo ahcun a hlannak in Arakan ramkulh chung ah kahdohnak a zual kho ”tiah Arakan ramkhel kong kherhlaitu U Phe Than nih a hmuh ning a chim.
”Tu bantuk in minute tlawmpal te chung kahdohnak hi cu thinphan awk a umlo nain hmailei kong ah ceihhmainak tlam a tlinlo i zumhnak a tlau ahcun a hlannak fak deuh in an i kap te lai, Mipi charnak tamtuk an tuar tthan lai’,tiah U Phe Than nihcun a chim chap.
November 9 chun zong ah Maungdaw peng Zenoh Ngathar( ရေနောက် ငါးသား) khua in meng 5 hrawng a hlatnak tupi chung ah AA le ralhrang kar kahdohnak a chuak i cu hmun hrawng ahcun ralser in an um tiah AA biachimnak nawl ngeitu U Khine Thu Kha nih a chim.
AA humhakmi ramchung ah ralhrang an rak luh ahcun zeitik paoh ah kahdohnak a chuak kho i tutan buainak kong ah kan karlak ah phu dang pawl nih ceihhmainak an kan kawlpiak tiah U Khine Thu Kha nihcun a chim chap.
AA le ralhrang hna hi kum hnih chung dengmang faktuk in an rak i kap i 2020 November thla ah kahdohnak chikkhat an ngol hnu kumkhat a tlin ah tu bantuk in nawlnolh in an van i kah tthan asi.
November 9 AA le ralhrang kahdohnak kong ah ralhrang lei biachim tawnmi Zaw Min Htun nihcun AA he si loin ARSA he kan i kap tiah lih in a rak chim.
Ref: Mizzima
