Rakhine ram,Maungdaw peng Taungpyu (orhlei) SAC sakhaan cu AA nih an laak caah SAC ralkap minung 66 cu Bangladesh ah an zam tiah 3 Brotherhood Alliance in an thanh.
Taungpyu SAC sakhaan (Orhlei le Kehlei) um sakhaan pahnih cu February 4 ah AA nih an tuk hi a si i orhlei um sakhaan cu an laak khawh cang i kehlei sakhaan zong nam cuahmah a si tiah an langhter.
Taungpyu (Kehlei) sakhaan um SAC ralhraang hna nih hriam nan chiah ah cun nan nunnak a him lai tiah AA nih ralrin an pek hna.an laak cang mi orhlei sakhaan ah hin SAC tamlak an thih leng ah hriamnam zong tampi an laak,AA lei zong in nunnak a pe mi an um ve tiah an langhter.
Bangladesh ram Home Minister Asaduzzaman Khan Kamal nih cun SAC ralkap an ram a phan mi hna cu khirh than dingin timhtuah nak an ngeih kong a chim.
“SAC ralkap hna cu thonginn ah kan chiah hna i Foreign Minister lei nih Myanmar ah kuat than ding timhtuah cuahmah lio a si.Bangladesh ram chung ah hin an rak luh awk a si lo” tiah a chim.
SAC ralkap hna cu kahdohnak chung ah an sungh caah India Mizoram,China lei hna ah an zam tawn i a tu ah Bangladesh ram lei zong an zam hi a si.
