Vawlei Pumpi In Ralzaam Nuai 100 Leng An Phan , Myanmar Ram Ah Nuai 1 Hrawng An Um

Vawlei Pumpi In Ralzaam Nuai 100 Leng An Phan , Myanmar Ram Ah Nuai 1 Hrawng An Um

Vawlei pumpi huap in inn le lo umnak hmun kaltak in ral a zaam mi Nuai 100 leng an si tiah UN nih May 23 ah a chim.

Buainak hna, hramhram thiltuahnak hna , nuhrin covo buarnak hna le hremnak hna chung in a zaammi Nuai 100 an phanh hi a voikhatnak bik a si tiah United Nations Officer for the Coordination of Humanitarian Affairs (UNOCHA) canthanhnak ah an langhter.

Myanmar ram telh in Afghanistan , Burkina Faso, Congo, Ethiopia le Nigeria ram hna ah inn le lo a zaamtak mi hi kum 2021 dongh tiangah Nuai 90 an phan tiah a langhter.

Cun kum 2022 hramthok in Ukraine-Russia raltuknak ruangah Nuai 14 nih inn le lo an zaamtak.

Myanmar ram ah cun SAC ralkap nih hramhram in nawlngeihnak a lak hnu kum khat leng caan chungah ralzaam thar 590,100 tiang an i chap tiah UNOCHA nih kum 2022 May thla thok a report ah a langhter.

A hlan lio te ah a rak um cia cangmi ralzaam 346,600 he fonh ahcun a tulio Myanmar ram ah ralzaam 936,700 leng an si tiah a langhter.

Hriamtlai buainak a fah khunnak Chin ramkulh , Magwe ramthen le Sagaing ramṭhen hna ah ralzaam thar 330,000 leng an a tambik an i chap i a tangmi cu Karen, Kayah, Shan, Mon, Taninthary le Bago ramṭhen hna in an si.

Nuai 100 a lonhmi vawlei pumpi ralzaam kan zoh a si ahcun ṭih a nung tuk i, buainak dihter zok a hau cang tiah UN nih a chim.