CBN Sport News, 17 Oct 2020: Portugal nih captain Christiano Ronaldo hmang kho hna hlah hmanh sehlaw Sweden tei dingin harsatnak an ngei loh. Estadio Jose Alvalade, Lisbon i an chuihnak ah Bernardo Silva nih goal hmaisabik a thun, Diogo Jota bawlung chanhmi a si.
Liverpool cakei Diogo Jota nih goal 2 a thun chap, Portugal nih 3-0 in teinak an hmuh.
Ronaldo umlo nak
Portugal le Sweden chuih ding zoh i hngah hlangnak bik pakhat cu Ronaldo ruangah a si, Juventus forward nih ram ca ah goal 101 a thun cang i record ngei dingin goal 9 lawng aa duh cang.
Asinain vanchiat ah France he an chuih khawh in Ronaldo hi Covid-19 positive a rak si i Sweden he an chuih nakding ah ai langh kho loh.
Defender thir vampang Pepe nih Captain Armband cawlcang kho lo in a kham colh, Ronaldo um hlah hmanh seh, Portugal nih player vikvak thatha an ngeih ruangah an chuih hramthawkkaa in an game a nung colh, Sweden he i tawng dingin Ronaldo um an herh loh.
A min cu Diogo Jota
Puai hramthawkka Minute pakhat hmanh a tlin hlan ah Diogo Jota nih Sweden team tlarhnung lei a dehcawh buai colh hna, a voih khatnak Sweden goal lei i a kick mi cu Goal tung leng bak ah a pial sual ai!
Minute 21 nak ah Diogo Jota a vun lang than, Bruno Fernandes nih tha taktak in bawlung a pekmi cu amah pumpak caa lawng ruat lo in Bernando Silva a pek, Silva nih dawh taktak in goal ah a thun.
First half (goal thlen hlan) ah Diogo Jota nih panelty kuun chung ah bawlung tha taktak in a ngah than i Goal ah a thun colh. Sweden nih cham than khawhnak caan tha taktak an ngei nain Marcus Berg nih goal pawngte ah a kick i goal a nganh.
Second half (goal thlen hnu) ah Patricio rian a tam, Kawlbawh nih Portugal ca ah riantha a tuan. Atletico madrid forward Joao Felix nih kawlbawh lawng a hmai ah a um cang nain goal ah a thun kho loh i Diogo Jota nih goal thun ning ding a tak in a vun cawnpiak.
Diogo Jota nih bawlung kuun cakehlei kam in bawlung a vun luhpi i goal hmualngei taktak a vun thun than. Portugal tlarhnunglei ah Patricio a cawlcangh a tha, Sweden lei Alexander Isak nih a lu in goal ah tauh luh khawhmi cu Patricio nih a caan hman te ah a rak kham khawh ruangah 3-0 in Portugal nih teinak an hmuh.
Zei bia dah an chim?
Portugal forward Diogo Jota nih “ka ca ah tuzan cu zan duhnung a si, ka career ah ka game thatbik nak a si rih, ram caah a voi 2 nak ka vun chuih than i 3-0 in teinak kan hmuh hi kai lawm tuk hringhran” tiah a chim.
UEFA Nations League champion lio nih hin an mah muallai ah match 20 chung teih lomi an ngei ti loh i Nations League ah match 10 an chuih cang i sungh (W7 D3) an ngei rih lo.
CBN Sport News
