Shan ram chaklei ah kalpi cuahmah mi Operation 1027 thla khat a tlin ni November 27 thok in ram pumpi huap (Nationwide Operation) ah kai in kan kal pi lai tiah ttangti phu 3 nih an thanh.
“Nationwide Operation” kal pi ding in timhcia kan si cang i operation 1027 thlakhat a tlin ni November 27 in kan kalpi lai.Myanmar chung mizapi hna chung ah hriamngan in a kap i a that cuahmah tu SAC ralhraang hna sakhaan pawl laak kahdohnak kip ah kan mah lei nih thisen,thlen le nunnak tampi pek in kan tuan chuah mi a si tiah an langhter.
Operation 1027 aa thok sin in tuni tiang tuanbia ah a cang dingmi kahdohnak pakhat hnu pakhat kan kalpi i ttangti phu 3 chung in phung khat cio i timhnak le zapi timhnak hna a tlamtlin khawh nak hnga lungrual tein dot khat hnu dot khat kan kal pi cuahmah tiah an langter.
“Teinak kan hmuh cia mi telhin tluk ruang tein cawlcangh tti nak in ram pumpi huap (Nationwide Operation) kal pi khawh nak ding ah cun ram mi zapi lung rual tein kan kal tti a biapi hringhran i pakhat cio itel tum nak lawng in hramhram uknak kan tei lai caah lungtho tein itel cio a herh” tiah ttangti phu 3 nih an thanh.
Ttangti phu 3 nih timh mi cu pehtlai in kalpi cuahmah a si i a thazaang a der nak hnga lo SAC nih hram hram in uknak a laak hnu ah a chuak mi dothlennak phu kip he ttangti in a ral tak tak aa khat mi vial te hmunkhat ah kan kal tti hna.
MNDAA le TNLA nih SAC ralhraang kut chung in an hmun le ram thing a rak si mi cu an laak khawh cang i MNDAA i hmunrampi a si mi Laukkaing khuapi zong fak piin tuk cuahmah a si i a rauh hlan ah a khuapi ningin kan laak cang lai tiah an thanh.
Rakhine ralkap AA zong nih ralkhine ram chung ah palek sakhaan hna cu hmuitinh in an doh hmasa hna i tu ni tiang ah palek sakhaan 4 cu an tuk i an laak bang in palek sakhaan 40 leng cu SAC nih an chuahtak caah tlamtling tein an laak khawh ve cang.
Cu leng ah Paletwa peng chung um SAC ralhraang hna caah a biapi ngai mi le fekthup in hmun an khuar nak Thron-Ai tectical sakhaan le Hnong-Bu sakhaan hna laak khawh nak ding ah November 14 khan thok in tu ni tiang pehzul in an doh cuahmah tiah theih a si.
