Sagaing ramthen,Kalewa Peng Aung Chian Tha khua laak kahdoh nak an tuah cuahmah caah a bawm tu ding ah a rak kai mi ralhraang hna cu lam tantim ah va kah ding in a kal mi tualchung hriamtlai phu hna cu Sin Ai Ma khua pawng an phak nizan November 9 ah ralhraang hna nih an kulh viar hna caah minung 30 tluk cu an tlaih hna.
“AungChianTha khua kahdoh nak ah bawm ding in a rak kai mi ralhraang hna lam tantim in va kah ding ah an kal lio ah ralhraang lei ngiathlai tu he an i ton caah ralhraang nih an kulh hna i an tlaih hna. Cu hnu ah an hriam an chiah ter hna i an bawh ter hna hnu ah an meithal puah thawng kan theih i a zam kho tawk an zam ve.a zam mi chung in minung 6 cu an luat. A thi timi ai fiang cang mihi minung 5 an si i tlaih a tong mi an dihlak ah minung 20 in 30 kar an si” tiah tualchung mi pakhat nih MFP ah a chim.
Hi kong he pehtlai in ralhraang hna nih nizan November 9 ah Kalewa peng chung ah PDF he kan i kap i PDF ruak 28 le an hriamnam hna kan char tiah telegram hmang in an thanh.
A luancia September 22 zong ah khan Monyua pengkomh chung ah ralhraang hna khuachung an luh caah a tlizam mi hna a bawmchan tu tualchung hriamtlai phu minung 23 le tualchung mi 3 an zapi minung 26 cu ralhraang nih an tlaih hna hnu ah an thah hna i an ruak cu lamkam ah an rak hlonh ta hna .
