1027 Operation cu caan zeimawzat ngol a si cang hnu ah a thar in pehzulh than a si i Ta’ang National Liberation Army – TNLA le ttangti phu hna nih SAC dohhram an thok than i nihin ah Nawnghkio le Kyaukme tiang an phan cang i khuachungum zung cheukhat ah hmun an khuar cang tiah theih a si.
Nawnghkio peng kahdohnak ah hin TNLA lei in Mandalay PDF le The Danu People’s Liberation Force – DPLF hna nih an telpi hna i a tu tan kahdohnak hi Kyaukgyi,Ungmati,Banboi khuate hna in khuapi chunglei an panh cuahmah i Nawnghkio khuapi chungi palik sakhaan,sizung le khuacaan lei zung i SAC hmunkhuar nak pawl an laak khawh cang tiah theih a si.
Cu bantuk thiam thiam in Kyaume khuapi No. 7 sang um Kyaukme district palik zung cu TNLA le ttangti hna nih an laak cang i a tu hi Kyaukme No. 2 sang ah kaphnih kar kahdohnak faak ngai in a chuak cuahmah.
Culawng si loin Mandalay ramthen, Mogok peng Paansape khua pawng zongah TNLA/PDF ttangti phu hna le SAC kar ah kahdohnak a chuak cuahmah i a tu tan a chuak mi 1027 operation a peh ah hin NUG kuttang um Mogok battalion in 1221,1222,1223 le 1224 battalion hna zong TNLA lei ttangin kahdohnak ah biatak tein an i tel cuahmah ve tiah theih a si.
