Myanmar Kong UN Security Council Cathanh Cung Ah Myanmar Zatlang Bu Tampi An Lungtling Lo
UN Security Council nih November 8 ah Myanmar kong ceihhmainak a ngeih hnu ah ”Myanmar ram kong ah kan lungrethei ”timi biafang ai telmi an cathanh mi cung ah Myanmar ram zatlangbu tampi an lung a tling lo i NU Security Council cathanh cu lungrawk ngai asi tiah cathanh an chuah ve.
A ruang cu UN Security Council nih Myanmar ram kong ah Min Aung Hlaing hruaimi ralhrang pawl cungah dantatnak pe loin ”Myanmar Ram kong ah an lungre theihnak kong lawng an ttial ”mi cung ah zatlangbu tampi in hruaitu cheukhat hna nih an lungrawknak kong an chim.
Chinram chung ah ralhrang tuahsernak a tthatlo tuk ruang le kahdohnak a zual tuk caah Chinram Thantlang khuachung inn 200 tluk a kang i Biakinn 2 ai tel, Myanmar ramchung le ramkip Zatlangbu 521 hna nih UN Security Council lakhruak meeting tuah ding ah November 4 ah nawlnak an rak tuah.
Ralhrang nih Myanmar mipi cung ah an tuahsermi vialte ngolhter ding le UN phung ningin dantatnak pek pin ah hriamnam ziarhti loding timi pawl sualphawtnak tuah ding in Zatlangbu hna nihcun UN Security Council sin ah nawlnak an rak tuah chih.
Cun, UN Security Council chungtel a simi India le Russia zong Myanmar ralhrang hna sin ah hriamnam a zuartu le a kuatu an si ve i a biapi bik in China hi Myanmar ralhrang hriamnam a bawmchantu bik asi tiah Zatlangbu hna nihcun an rak chim.
UN Security Council cathanh chuahmi kong he pehtlai in “Progressive Voice” in Daw Khin Ung Ma nihcun ” UN Security Council tuahsermi cu lungrawk ngaingai asi. Vawlei cung ah nawlngei bik Phu asimi nih ” Kan lungre thei( Worried) timi biafang he cathanh an chuahmi nih Myanmar mipi an thatnawngtu ralhrang pawl le Mipi hi a biapi ah an kan chialo ti a langhter. Myanmar ramchung ah a chuakmi thahnawnnak hi Vawlei cung ram vialte daihnak serding le UN Security Council caah zuamcawhnak pakhat bantuk asi. Cun UN Security Council nih a tuah dingmi rian a dawnkhantu ram pawl hi Myanmar rammi kan sifah le kan harsat le thah le nawn kan tonmi kong ah ralhrang a forh in a forh chintu an si bang anmah ah sual phawtnak le ttuanvo lalnak a um” tiah achim.
Chin Human Right Organization (CHRO)nin Salai Za Uk Ling nihcun ” UN Security Council nih Myanmar kong ceihpiak ding in kan nawl hna i an ceih cuahmah lioah Thantlang ah inn pawl an khangh chap hoi. Chin ramchung ah August thla thok in a tutiang ah Ralhrang nih an thazang an chap chin lengmang i Biakinn 22 renglo an khangh cang. Zeitluk in hal zong ah mipi chanhchuahnak rian ah hma a kal lomi hruaitu UN Security Council cung ah ka zumhnak hna atlau cang” tiah a chim ve.
Women Peace Network in Ma WayWay Noe nihcun ” UN Security Council i dantatnak ah an tha a dermi hi ttihnung tukmi asi. 2017 lio i Rohingya miphun thahnawnnak hlan khan miphun hloh thahnak an rak tiah lengmang ko nain tutiang dantatnak an tuah bal hna lo,Hi nih a langhtermi cu UN Security Council an tlaktuknak kha asi ” tiah a chim ve.
Ralhrang nih uknak a lakni February 1 in tutiang ah Myanmar mipi 1252 a thah hna i 1,0000 tluk thong a tlak hna tiah Khit Thit Media nih ttial.
