MNDAA Sakhan 2 Ralhrang Nih Luhhnawh Hna
Shanram chaklei, Moneko khua Kokang (MNDAA) ralkap umnak sakhan 2 cu tuni(November 15) chun slm 12 hrawng ah ralhrangbu nih an nam hna tiah theih asi.
Moneko khuapi, Hpuk Jawng khua le KawngLung hmun ah ummi MNDAA sakhan hnacu chun ah ralhrang nih an nam hna i kahdohnak a chuak tiah khuami pakhat nih a chim.
”KawngLung ah ummi ralhrang pawl cu phuhnih ah an i tthen i an va kah thulh hna, an kir thulh tthan, Pyuhkya bantuk in an kah hna. Kokang ralkap( MNDAA) lei hliam le thih an um lo, Ralhrang pawl nihhin ke bakin an fuh hna” tiah khuami pakhat nih a chim.
Ralhrang pawl nih kahdohnak a chuahnak pawngkam ah hriamngan phuah thlorh in an puah tiah a chim chih.
Moneko le Moepan pengkomh chung ah thazang chap in a rami ralhrang mawtaw run cu November 11 ahkhan Kokang ralkap (MNDAA) nih an kah hna i ralhrang mawtaw 9 an i rawk.
Kahdohnak dai deuh seh tiah Moneko hmun ah hmunkhuarmi MNDAA Sakhan 3 cu hnu kir dingin MNDAA Headquarter nih November 10 ah nawl a rak chuah nain tutiang Moneko ahcun kahdohnak a fak peng tthiam.
Ref: The 74 Media
