KhinOo Peng Ah PDF 11 le Civil Mi 3 Ralhrang Nih An Thah Hna
Sagaing ramtthen, KhinOo peng, Theidaw khua ah Nizaan March 8 chun ah ralhrang pawl khuachung ah an rak lut i PDF 11 le khuami 3 an thah hna i khualeng ah an ruak an hlonh tiah Yangon Khit Thit Media nih a tarlangh.
Hi ralhrang pawl hi Theindaw khuapawng ah bomb puahhnawh an tong i rakhrang pakhat a thi i hliamtuar an tam a thimi ruak cu Theidaw khuachung ah mei in an khangh, Theindaw khuachung an luh lai ahhin khuachung lei ah hriamngan zuun 50 hrawng an kah hmasa, Cu hnu ah khuami 3 le PDF 11 cu khuapawng i leikuang ah an thah hna tiah khuami hna nih an chim.
Ralhrang pawl cu Thetpekyin khua ah an lut tthan i inn an duah hnu ah tuni March 9 ah Moethar khua lei ah an kal i khuaching ah thilri an hrawh len tiah theih asi.
