Kawthoung peng ah nga tlaihnak tilawng 3 mei a kang i 1 a nunnak a liam,4 hliam fak an tuar
Taninthayi ramthen,Kawthoung peng,Aye Yiut Nyain sang,Shwe Watwan hlei ah a dir mi nga tlaihnak tilawng 3 cu nizaan chun sml 1:30 hrawng ah mei a kang tiah khuami sinin theih a si.
Nizaan August 8 chun sml 1:30 hrawng ah Htet Htet Paing nga tlaihnak tilawng in mei a thok i cu hnu ah a pawng ah a um mi nga tlaihnak tilawng 2 cu mei nih a tlaih ve tiah theih a si.
Mei kangh a thoknak a ruang cu nga tlaihnak tilawng chuah ding ah mei line pawl ser a si lio ah wire shock a si tiah mei that zung nih a chim.
Cun meithat zung pawl le mipi pawl i fonh in meithat mawtaw 8 he mei cu an thah i chun sml 2:30 hrawng ah mei cu a thi tiah theih a si.
Cu mei kangh ruang ah Kawthoung peng,Thiri Myaine sang ah a um mi Ko Zin Lin Htun(35) cu mei kanghnak hma in a nunnak a liam i Shwe Min Wan sang ah a um mi U Aung Kyaw Moe cu a ke pahnih tein mei kanghnak hliam a hmu,Aye Yiut Nyain sang um Ko Paing Soe (27) cu a ke pahnih le a lu ah mei kanghnak hliam a hmu i an pahnih tein an i hliam mi a fah caah an nunnak caah thin phang a si tiah theih a si.
Cu leng in Thiri Myaine sang um Ko Moe Swe le Thayatchaung khua um Ko Thine Naing Win hna cu an i hliam ve ruang ah Kawthoung siizung pi ah kal pi an si tiah theih a si.
Cu nga tlaihnak tilawng 3 cu Kawthoung peng,Kaanna lam Annawar sang i khuami 1 nih a ngeih mi a si i cu mei kangh ruang ah a rawk mi hi ting 3000 man hrawng a si men lai tiah meithat zung tuanvo ngeitu pawl nih an tuaknak in theih a si.(Crd.Ayeyarwaddy Times)
