Karenni ramthen i 11.11 operation ah Karenni ttangti phu hna nih November 11 ah an rak kahthlak mi SAC ralhraang hna jet fighter mawng tu (Pilot) hna pahnih chung in pakhat cu an tlaih khawh cang tiah theih a si.
Hi vanlawng mawng pa hi Karenni ramri Hprusu in nithlak lei hmun pakhat ah an tlaih mi a si. A tutan an tlaih mi pa cu a himnak hmun ah kan kuat cang tiah Karenni raklap lei nih cun an chim. November 11 ah aa thok mi 11.11 operation ah Hprusu,Demawsoe le Loikaw peng chung hna ah kahdoh nak fak piin a chuak i cu kahdoh nak ah SAC lei in kah a rak bawm tu jet fighter pakhat cu karenni ttangti phu hna nih an rak kah caah an rak thlak khawh nain vanlawng mawngtu pahnih hna cu parachute in an zuang i an rak zam kho.
November 11 ah an rak kah mi jet fighter cu Than-Taung-gyi peng Kama-Di-Puli khuate le Raw-pu-li khua karlak ramtang pakhat ah an kah thlak thaizing November 12 ah an rak char tiah NUG cozah lei zong nih a rak thanh ve.
