Chin Ramkulh Ah SAC kuttang Sianginn Kaiding 22,000 Deng An Si, Paletwa peng An Tam Bik
Chin ramkulh ning in May 31 tiangah sianginn aa apmi 22,000 hrawng an si i 2022-2023 cacawn kum caah sianginn ap a tambik nak hi Paletwa peng a si tiah Chin ramkulh Peng fimcawnnak zung in rianṭuantu pakhat nih a chim tiah Chin World nih a langhter.
“May 31 tiang Chin ramkulh chung sianginn a apmi hi 22,000 hrawng an si, Sianginn hi June 2 ah on a si lai. Paletwa pengah sianginn a apmi an tambik. Tukum cacawn kum zong kum dang bantuk in thla 9 kai a si lai. Saya/mah an tlamtlin ning in chimh a si lai”.
June 1 Naypyitaw ah tuah a simi Press Conference zongah sianginn ap a tlawmbik nak hi Chin ramkulh a si i sianginn a apmi 20,000 luan hrawng lawng an si tiah General Zaw Min Htun nih a chim.
2022-2023 cacawn kum caah Thantlang le Kanpetlet peng telh loin a dang peng 7 ah June 2 in sianginn on a si i CDM a tuahmi saya/mah an tam caah cacawnnak thazang a der a si ahcun sianginn on khawh a si lonak hmunhma i saya/mah pawl a herh ning in auh a si lai tiah Peng fimcawnnak zung in rianngeitu pakhat nih a chim.
