Myanmar i a um mi Chin miphun hna,Manipur i a ummi Zo miphun nih Mizoram cozah hi phu dang dang in kan tong lengmang ti hlah uh tiah Mizoram Chief Minister Pu Lalduhoma nih nizan June 28 ah a chim.
Mizo National Front – MNF le India cozah kar remdaihnak min an thut kum 38 a tlin ni sunglawi an hman mi ah a tu bantuk a chim hi a si.Mizo hna nih hin 1966 in 1986 tiang kum 20 chung India cozah cu doh in mah te khuakhan lairel khawh nak ding caah dothlennak an rak tuah ve.
“Chin ram a um mi dothlennak phu nan si ah Manipur um Zomi nan si ah phu dang dang cio in kan tong lengmang ti hlah uh.phu khat le phukhat rem nak kawl ulaw.pumkhat si nak kawl uh.” Tiah a chim.
Mizoram cozah cu ramdang um Chin Community phu phunphun,Ram chung hriamtlai phu phun phun le Manipur lei in Kuki le Zomi phu hna tiin phu dang dang in an ton cio hi a si.
Atu lio hi Chin hnahthlak pawl um nak Manipur,Bangladest le Myanmar hna ah buaibainak a chuah caah Mizoram ah ralzam minung 44,000 an um cuahmah lio a si.a tu bantuk thil a can hi ka ruah tikah Britist cozah nih ramri a then ruang ah ram pahtum ah aa then mi Chin hnahthlak miphun vialte hmun khat ifuntom khawh nak ding ah Pathian khua khan a si kho tiah Pu Lalduhoma nih cun a chim.
Mizoram CM cu Zo Re-unification Organisations – ZORO chungtel a si i Zoro cu Chin hnahthlak hmunkip a um mi hna hmunkhat ifumtom i uknak pakhat tang ah a kal khawh nak hnga a duh mi phu an si.
