Israel le Hezbollah hna karlak i thla 13 chung kahdohnak le buaibainak kong a daih ter kho ding hnatlak nak pakhat cu tlamtling tein tuah khawh a si cang tiah US president Joe Biden nih nizan ah a thanh.
An ram caan in November 27 zinglei slm 4:00AM thok in Israel le Lebanon ramri i kahdohnak vialte ngol a si lai tiah a chim. Cu hnatlak nak nih cun Israel le Lebanon hrambunh Hezbollah hna caah hmailei caan tiang a daih ding a si a ti.
Israel cu nikum 2023 October thla thok khan a ram in chaklei Gaza ah Hamas phu he kahdohnak an tuah sinin Hezbollah he zong kahdohnak an rak thok ve. Cu kahdohnak cu nikhat hnu nikhat in a lian chin lengmang i kan hnu 2024 October thla thok khan Israel nih cun Lebazon chung a um mi Hezbollah hmunkhuar nak pawl cu vanlei in biatak tein kahdohnak a tuah leng ah vulei zongin ralkap a thlah i kahdohnak a tuah.
Israel he aa tu cuahmah mi Hamas phu le Hezbollah phu hi Israel caah zungzal ral a si mi Iran ram nih a dir kamh hna an si.
Israel Prime Minister Benjamin Netanyahu nih cun American le France hna i tawlrel piak mi a si caah kahdohnak ngol ding hi kan lung a tling nain Hezbollah lei nih phung an buar ah cun kahdohnak a kal than lai tiah a tlerhkhawnh hna.
American cozah nih statement a chuah ningah Israel le Hezbollah karlak kahdohnak ngol dingin hnatlaknak an ngeih mi hi ni 60 chung ca a si i hi chung ah Lebanon chaklei i Israel ralkap pawl hnu an tolh lai. Littany tiva kam ah a um mi Hezbollah pawl zong hnu an tolh ve lai i Lebanon cozah ralkap nih hmun an khuar hna lai tiah aa tel.
A tu bantuk kahdohnak ngol nak hi caan saupi a daih ding asi i daih nak a chuah pi lai caah ram hnih chung i ralzaam pawl zong an mah le hmunhma ah hnangam tein khua an sa kho lai tiah US le France nih an thanh.
