A tanglei cakuat hi Tuluk ram ah nihin a cang cuahmah mi Conoravirus pulrai ruang ah harnak sursalai a ummi Khrihfa pastor nih Khrih ah Khrihfa hawikom sin ah thlacam a cahmi Cakuat a si.
Ka Uu le Ka Nau hna, Nan cung ah Daihnak Um Ko Seh.
A tukarhawng cu ka nunnak le ka khuaruahnak dihlak ahhin Wuhan Virus (rai) kong lawngte hi a um. Thawngpang le dide kan ngai kan rel kan zoh, hi thil hi kan chungkhar le kan Khrihfabu nih zeitindah kan intuar ning a si telai timi kong lawngte ko ka ruat ko.
Keimah zong ka chungkhar ca ah tiin hmaihup siseh, rawl siseh; timhtuah khawhmi zat ka timhtuah i, a si khawh chungin lengchuah hna hrial a hauh ca ah hrial a si. Lengchuah tikah hmurhup kha i huh a si. Asinain, zeizong te hi Bawipa kut ah ka chiah ko.
Kan khrihfabu ca ah zeitindah a himmi bu kan ser khawh lai, hi zawtnak rai nih kan member a hun chawnhbarh tikah kan zumhnak ah Bawipa tehte a ngeimi kan si dingmi hi kan ca ah zuamcawhtu ngai a hung si. Kan zumhnak hneksaknak ca ah hi thil a hung chuah hi a si kho ko.
Atu kan sining hi a biapi taktak mi dirhmun ahkhin kan um. Bawipa a biakamnak cu kan zumh peng ko, kan ca ah a khuakhannak hi thatlonak ca ah siloin Daihnak ca ah a si tiah (Jeremiah. 29:11) ah a kan chimh bantuk khan a si. Hneksaknak kha kan ca ah nawl a onh ko, asinain hneksaknak nih a kan hrawk lai lo, kan fehnak tu ah a si ko lai. Cu ca ah; kan nih Khrihfa hna cu tihphannak in a khatmi khuami hna he tuarnak aa hrawmti ding lawng siloin an ca ah thla a campiaktu hna si awkah tuanvo kan ngei. Cuticun Jesuh Khrih sin in a rami Daihnak kha an sinah kan chiah khawh lai.
Pakhatnak ah; Kan thinlung a uktu si awkah Jesuh Khrih pekmi daihnak kha kan kawl awk a si (Hebrews 3:15). Jesuh nih daihnak a kan pek cia mi kan si, cu daihnak cu thihnak le harnak nih a lak khawh lomi daihnak a si. Harnak le dihnak laifang zong ah cu daihnak a ngei ding cu kan si. Zei ca tiah Jesuh nih hithil vialte cu a tei dih cang cu! (John 14:27, 16:33). Cuti a si lo ahcun, kan nih nih Daihnak Thawngtha (Ephesians 6:15) kan zumh lo ah pei a can lai cu. Cu zumhnak cu vawlei he tihphan ve ko, pulrai, thihnak le harnak chungah ruahchannak hei thlau kha a si.
Zeiruangah dah Khrihfa lawnglawng hi Daihnak hi kan ngeih hnga? Cucu sualnak ruangah khan a si. Minung hna hi tem-innak le harsatnak hmu awkah ai tlak ngaingai mi kan si. Zei ca ah? Bawipa nih pei misual cu daihnak a ngei lo tiah (Isaiah 48:22) a ti cu. Misual kan rak si. Asinain Khrih nih kan zumhnak thawngin kan sualnak kha aa lak i, a daihnak tu a kan pek. Cu ca ah cun pei Mithiang Paul nih (Rom Cakuat 8:33) ah ” 33Pathian thimmi cu aho nih dah sual an puh khawh hna lai? Amah Pathian hrimhrim nih pei, nan sual lo, tiah a ti hna cu” a ti cu. Khrihfa mi hna hi vawlei minung hna he harnak kan tong kho lai, hi harnak hi kan ca ah hremnak a si lo. Kan thinlung thianternak ca ah siseh, Bawipa he kan i naihchin nak hnga ca ah siseh, Thawngthabia phuannak ca ah caantha kan ngeihnak caan tu an si deuh.
Phundang in kan chim ahcun harnak nih a hun kan den tikah Bawipa dawtnak phunkhat a si ti awk a si. Cucu Mithiang Paul nih fek tein a zumh ca ah, “Cucaah aho nih dah Khrih dawtnak he cun a kan ṭhen khawh lai? Harnak nih maw, temhinnak nih maw, hremnak nih maw, rawlṭamnak nih maw, pamnak nih maw thil ṭihnung nih maw, thihnak nih maw, zeital nih an kan ṭhen kho hnga maw? 36Cathiang nih,
“Nangmah ruangah chun nitlak
-
- thah hrulh lengmang in kan um;
- thah awk i kalpimi tuu bantukin
- an kan tuah,” *
tiah a ti bantuk khan a si.
- an kan tuah,” *
37Zeihmanh nih an kan ṭhen kho lai lo, hi thil vialte hna chung hin a kan dawtu thawngin kannih cu teitu hna nakin teitu kan si deuh. 38Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, 39cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.” tiah a chim.
Wuhan pulrai nih Jesuh dawtnak he a kan then kho lo. “Jesuh he pumkhat kan si” timi bia nih hin a tulio ah a kan hnemh peng. Kam khatlei ah harnak kan tuar ko nain kamkhat lei ah Bawipa sunparnak kan i hrawm kho. Khrih nih a ngeihmi dihlak cu kan ta a si ve i, kan dihlak zong hi Khrih ta kan si. Cu ca ah pulrai lakah Khrih nih a kan umpi, pulrai nih harnak a kan pe kho lo. Kan thih ahcun, Jesuh Khrih hmuhnak caantha kan ngei ko lai.
Cu ca ah ka uu le ka nau hna, Jesuh dawtnak ahkhan fek tein um awkah thazaang pek kan duh hna. Pulrai ruangah thihnak kha fak deuh kan tuar a si ahcun, Jesuh dawtnak kan chung ah thukpi in pil khawh i zuam usih. Thawngtha bia kha fiang usih. Kan Pathian cu thihnak a teitu, Jesuh Khrih kha thihnak in a thawhter, a orhlei kut ah a chiatu a si. (Acts 2:32-36)
Hi Cakuat na rel in Daihnak na hmuh lo sual ahcun a cunglei Bible cacang hna kha hun rel than hna le Bawipa sin ah thlacam. Bawipa nih na lungchung uktu ah Jesuh Daihnak an pek lai. Tutan kan thilton hi thil hi harnak sawh a si lo. Thlarau zuamcawhnak hmanh a si deuh. Na thinlung ca ah raltu hmasa law, cu hnu ah kan khuami mipi ca ah thlacam ral tu ve te.
Mathai thawngtha chung ah “Pithlung pakhat hmanh khi nan Pa theih loin vawlei ahhin a tlong lo” tiah a ti. Nihin ah minung tampi hna cu pulrai he an i pai cuahmah, hihi Pathian thil timh a si kho maw? Kan hngalhmi cu Abraham chan Sodom le Jonah chan Nineveh bang a si lo tihi a si.
Pathian nih Sodom khua ah a rak ummi mithiang pa pakhat ruangah maw khuapi kha biaceihnak in rak zangfah lengmang a si, keh le orh hmanh a hngal lomi minung 120,000 ruang ah dah timi nih nihin Wuhan khuapi ah zumtu minung zeizat dah kan um timi kha ruah awk a si. Hi khuapi chung ah a thiangmi kan si. Lot bantukin maw khuapi cu kan tah lai (1 Peter 2:7), Abraham bantukin dah thla kan cam lai (Genesis 18:23-33). Jonah nih harnak chung ah Nineveh khuapi ca ah thawngtha a phuan. Khamhnak an hmu i, an luat. Cu ca ah kan nih zong Bawipa vel ca ah thla kan cam hrimhrim awk asi.
Tutan kan thilton hi Wuhan khuapi ca ah bawipa kawhnak a si lai tiah ka ruah. Hi khuapi ca ah Daihnak kan kawl a herh. Hi Zawtnak he ai paimi hna ca ah daihnak kan kawl awk a si. Zawtnak a thloptu siibawi hna ca ah daihnak kan kawl piak hna awk a si. Cozah riantuan vialte hna ca ah Daihnak kan kawlpiak hna awk a si. Wuhan khuapi ca ah daihnak kan kawlpiak hna awk a si. Online network hmanh in kan hawikom hna kha kan hnemh khawh hna, an nih sin ah kan nunnak hi kan kut ah a um lo timi hi kan chimh hna lai. Pathian sinah an nunnak ap ding in kan chimh hna awk a si.
A luancia ni tlawmpal ahkhan ramdang pastor hna sin in thawnghalnak tete tampi ka hmuh. Khrihfabu kip nih hi khuapi ca ah an thin a phan cio ning zong an hun ka kuat len. Kan mah nak hmanh in an thla a lau deuh, hi khuapi bawmhnak ca ah a lamkip in lam an kawl cio hna. Jesuh sin ah nan mit au ko u tiah ka hei chimh len hna. Kan ca ah dirhmun tha deuh siding ah lungretheih ter tuk awk lo ah le, tihphan piak tuk a si lo zia ka chimh hna. Asinain, Jesuh min in thlacam bel ka cah hna.
Thinlung tha a ngeimi hna nih khuapi ca ah rian an tuan. Abiapi in sii-ai lei riantuantu hna nih tihnung harnak lak ah rian an tuan hna. Hi tluk in vawlei thil ah kan i pek khawh ahcun, kan nih nih teh Thlarau lei ah tuanvo kan ngeih timi hi biahal awk ngai a si!
Thlacam piaktu si awk ah tuanvo khinhnak lungthin na ngeih lo sual ahcun, Bawipa sin ah dawtnak thinlung rak hal ve. Thla a cammi thinlung rak hal vete. Na lungkuai in thla na cam lo ahcun, Bawipa sin ah mitthli rak hal. Aruang cu, Bawipa vel pakhat lawnglawng nih hin hi khuapi nih a khamh khawh ruang ah a si.
Wuhan Pastor
January 23, 2020
